സൗന്ദര്യ ഗുണങ്ങൾ

ചർമ്മം: പ്രകൃതിദത്തമായ ചർമ്മ എണ്ണകൾ ഉത്പാദിപ്പിക്കാൻ അമുക്കുരം സഹായിക്കുന്നു. ചർമ്മത്തെ സമ്പുഷ്ടമാക്കുന്ന സംയുക്തങ്ങളായ ഹയാലുറോണൻ (ജലാംശം), എലാസ്റ്റിൻ (സൗമ്യത), കൊളാജൻ (ബലം) എന്നിവയുടെ ഉത്പാദനത്തിനും ഇത് സഹായകമാണ്. അമുക്കുരം പൊടിച്ചത്, തേനിലോ പാലിലോ കലർത്തി ഒരു ടോണറായി ചർമ്മത്തിൽ പലരും ഉപയോഗിക്കാറുണ്ട്.

മുടി: ആയുർവേദ ഷാംപൂകളിൽ ഉപയോഗിക്കുന്ന പ്രധാന ചേരുവകളിലൊന്നാണ് അശ്വഗന്ധ അഥവാ അമുക്കുരം. ശിരോചർമ്മത്തെ ഉത്തേജിപ്പിക്കുന്നതിനും രക്തചംക്രമണം മെച്ചപ്പെടുത്തുന്നതിനും താരൻ പ്രതിരോധിക്കുന്നതിനും ഇത് ഉത്തമമാണെന്ന് അറിയപ്പെടുന്നു. ഇത് മെലാനിൻ ഉൽപാദനവും മെച്ചപ്പെടുത്തുന്നു. നിങ്ങളുടെ മുടിക്ക് സ്വാഭാവിക നിറം നൽകുന്ന പിഗ്മെന്റ് ആണ് മെലാനിൻ. അതുപോലെ, മുടി നരയ്ക്കുന്നത് മന്ദഗതിയിലാക്കുകയും അവയ്ക്ക് ആരോഗ്യകരമായ തിളക്കം നൽകുകയും ചെയ്യുന്നതും അമുക്കുരത്തിന്റെ ആനുകൂല്യങ്ങളിൽ ഉൾപ്പെടുന്നു.

സമ്മർദ്ദം കുറയ്ക്കുന്നു

സമ്മർദ്ദം ലഘൂകരിക്കാനും മാനസികാവസ്ഥയും ഊർജ്ജ നിലയും ഉയർത്താനും ഏകാഗ്രത മെച്ചപ്പെടുത്താനും ഉത്തമമാണ് എന്ന പേരിൽ അറിയപ്പെടുന്ന ഒരു ആയുർവേദ ഔഷധ സസ്യമാണ് അമുക്കുരം. സമ്മർദ്ദത്തിൽ നിന്നും ആശ്വാസമേകുന്ന നിരവധി ഗുണങ്ങളുണ്ട് ഇവയ്ക്ക്. ഇത് നന്നായി ഉറങ്ങാൻ സഹായിക്കുകയും മനസ്സിനെ ആരോഗ്യകരമായി നിലനിർത്തുകയും രക്തത്തിലെ അമിതമായ കോർട്ടിസോൾ മൂലമുണ്ടാകുന്ന ഹോർമോൺ അസന്തുലിതാവസ്ഥ ഒഴിവാക്കുകയും ചെയ്യുന്നു. നിങ്ങളുടെ സമ്മർദ്ദ നില നിയന്ത്രിക്കുന്നത് വാർദ്ധക്യത്തിന്റെ ലക്ഷണങ്ങൾ പ്രതിരോധിക്കുവാനും സഹായിക്കും എന്നത് ഇതോടൊപ്പം കൂട്ടി വായിക്കേണ്ടതാണ്.